#MeToo ಅಭಿಯಾನ ದೇಶದಾದ್ಯಂತ ಸಂಚಲನ ಸೃಷ್ಟಿಸುತ್ತಿದೆ. ಉತ್ತರ, ದಕ್ಷಿಣ ಭಾರತ ಎಂಬ ಭೇದಭಾವ ಇಲ್ಲದಂತೆ ಹಲವು ಖ್ಯಾತನಾಮರು ಲೈಂಗಿಕ ಕಿರುಕುಳ ಆರೋಪಕ್ಕೆ ಒಳಗಾಗಿದ್ದಾರೆ. ಸ್ಟಾರ್ ಹೀರೋಗಳು ಸಹ ಸಂತ್ರಸ್ತರಿಗೆ ತಮ್ಮ ಬೆಂಬಲ ಸೂಚಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ‘ಮಿ ಟೂ’ ಬಗ್ಗೆ ಆರಂಭದಲ್ಲಿ ಮೌನ ವಹಿಸಿದ್ದ ಬಿಗ್ ಬಿ ಅಮಿತಾಬ್ ಬಚ್ಚನ್ ಸಹ ಪ್ರತಿಕ್ರಿಯಿಸಿದ್ದಾರೆ.
ತನ್ನ 76ನೇ ಹುಟ್ಟುಹಬ್ಬದ ಸಂದರ್ಭದಲ್ಲಿ ಅಮಿತಾಬ್ ನೀಡಿರುವ ಸಂದರ್ಶನದಲ್ಲಿ ಈ ಬಗ್ಗೆ ಮಾತನಾಡಿದ್ದಾರೆ. ಮಿ ಟೂ ಬಗ್ಗೆ ಟ್ವಿಟರ್‌ನಲ್ಲೂ ಪ್ರತಿಕ್ರಿಯಿಸಿದ್ದರು. ಆದರೆ “ಮಿ ಟೂ” ಅಭಿಯಾನದಿಂದಾಗಿ ಅಮಿತಾಬ್ ಬಚ್ಚನ್ ಸಹ ಈಗ ಕಿರಿಕಿರಿ ಅನುಭವಿಸುವಂತಾಗಿದೆ.
ಅಮಿತಾಬ್ ಮಾಡಿರುವ ಟ್ವೀಟ್ ಬಗ್ಗೆ ಬಾಲಿವುಡ್ ಹೇರ್ ಸ್ಟೈಲಿಸ್ಟ್ ಸಪ್ನಾ ಭವ್ನಾನಿ ಪ್ರತಿಕ್ರಿಯಿಸಿದ್ದಾರೆ. “ಇದು ತುಂಬಾ ದೊಡ್ಡ ಸುಳ್ಳು. ಸರ್ ನೀವು ಅಭಿನಯಿಸಿರುವ ಪಿಂಕ್ ಸಿನಿಮಾ ಬಂತು, ಹೋಯಿತು. ಅದೇ ರೀತಿ ಅತಿ ಶೀಘ್ರದಲ್ಲೇ ನಿಮಗಿರುವ ಸಮಾಜವಾದಿ ಎಂಬ ಹೆಸರು ಹೋಗುತ್ತದೆ. ಶೀಘ್ರದಲ್ಲೇ ನಿಮಗೆ ಸಂಬಂಧಿಸಿದ ಸತ್ಯಗಳು ಹೊರಬೀಳಲಿವೆ. ನನ್ನ ಟ್ವೀಟ್ ಓದಿದ ಕೂಡಲೆ ನೀವು ಗಾಬರಿಯಿಂದ ಉಗುರು ಕಚ್ಚಿಕೊಳ್ಳುತ್ತೀರಿ ಎಂದು ನಂಬಿದ್ದೇನೆ. ಆದರೆ ನೀವು ಕಚ್ಚಿಕೊಳ್ಳಲು ಉಗುರು ಸರಿಹೋಗಲ್ಲ” ಎಂದು ಟ್ವೀಟ್ ಮಾಡಿದ್ದಾರೆ.
ಈ ಟ್ವೀಟ್ ನೋಡಿದ ನೆಟ್ಟಿಗರು ಅಮಿತಾಬ್ ಬಗ್ಗೆ ಏನೆಲ್ಲಾ ಆರೋಪಗಳು ಬರುತ್ತವೋ ಎಂದು ಕುತೂಹದಿಂದ ಎದುರು ನೋಡುತ್ತಿದ್ದಾರೆ.
Comments are closed.