ನಟಿ ರಶ್ಮಿಕಾ ಮಂದಣ್ಣಗೂ ಕಾಡುತ್ತಿರುವ ವೃತ್ತಿ ಜೀವನದ ಅಭದ್ರತೆ..!

ರಶ್ಮಿಕಾ ಮಂದಣ್ಣ ಅತಿ ಹೆಚ್ಚು ಟ್ರೋಲ್​ ಆಗುವ ಕನ್ನಡದ ನಟಿ ಎಂದರೆ ತಪ್ಪಾಗದು. ಇದೇ ಕಾರಣಕ್ಕೆ ಆಗಾಗ ಟ್ರೋಲ್​ ಮಾಡುವವರಿಗೆ ಸರಿಯಾಗಿಯೇ ಕ್ಲಾಸ್​ ತೆಗೆದುಕೊಳ್ಳುತ್ತಿರುತ್ತಾರೆ. ಇದರ ಜೊತೆಗೆ ಸಮಯ ಸಿಕ್ಕಾಗಲೆಲ್ಲ ಅಭಿಮಾನಿಗಳಿಗೆ ಕೆಲವೊಂದು ವಿಷಯಗಳಲ್ಲಿ ಪಾಠ ಮಾಡುತ್ತಿರುತ್ತಾರೆ.

ಇತ್ತೀಚೆಗಷ್ಟೆ ರಶ್ಮಿಕಾ ತಮ್ಮ ಸಂಪೂರ್ಣ ಪ್ರೀತಿಯನ್ನು ಮುಗ್ಧ ಜೀವಿಗಳಿಗೆ ಅಂದರೆ ಸಾಕು ಪ್ರಾಣಿ-ಪಕ್ಷಿಗಳಿಗೆ ಕೊಡಿ ಎಂದು ಮನವಿ ಮಾಡಿದ್ದರು. ಈಗ ಜೀವನದಲ್ಲಿ ಎಲ್ಲರಿಗೂ ಕಾಡುವ ಅಭದ್ರತೆ ಬಗ್ಗೆ ಪಾಠ ಮಾಡುತ್ತಿದ್ದಾರೆ.

ಲಾಕ್​ಡೌನ್​ನಲ್ಲಿ ಸಾಕಷ್ಟು ಮಂದಿಗೆ ನಾನಾ ರೀತಿಯ ಅಭದ್ರತೆ ಕಾಡಿರುತ್ತದೆ. ಕೆಲವರು ಸಣ್ಣಗಾಗಿದ್ದು, ತೂಕ ಹೆಚ್ಚಾಗಿದ್ದು, ಕಪ್ಪಗಿರುವುದು ಹೀಗೆಲ್ಲ ಸಣ್ಣ ಸಣ್ಣ ವಿಷಯಗಳ ಬಗ್ಗೆ ಯೋಚನೆ ಮಾಡಲು ನಮ್ಮ ಸಮಯವನ್ನು ಕೊಟ್ಟಿದ್ದು ಎಷ್ಟು ಸರಿ..? ಈ ಲಾಕ್​ಡೌನ್​ನಲ್ಲಿ ನನಗೂ ನನ್ನ ಕೆಲಸದ ಬಗೆಗಿನ ಅಭದ್ರತೆ ಕಾಡಿತ್ತು ಎಂದು ರಶ್ಮಿಕಾ ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಬರೆದುಕೊಂಡಿದ್ದಾರೆ.

ಕೆಲಸ ಮಾತ್ರವಲ್ಲ ಅವರ ಮಾನಸಿಕ ಹಾಗೂ ದೈಹಿಕ ಆರೋಗ್ಯದ ಬಗ್ಗೆಯೂ ಅಭದ್ರತೆ ಕಾಡಿತ್ತಂತೆ. ಆದರೆ ಈ ಸಮಯದಲ್ಲಿ ಅವರಿಗೆ ಅರ್ಥವಾಗಿದ್ದು, ಎಲ್ಲವೂ ನಮ್ಮ ನಿಯಂತ್ರಣದಲ್ಲಿ ಇರುವುದಿಲ್ಲ. ಯಾವುದನ್ನು ನಿಯಂತ್ರಿಸಬಹುದೋ ಅವುಗಳ ಬಗ್ಗೆ ಯೋಚಿಸೋಣ..! ನಮ್ಮ ಅಭದ್ರತೆಯನ್ನೇ ಶಕ್ತಿಯನ್ನಾಗಿ ಬದಲಾಯಿಸಿಕೊಳ್ಳೋಣ. ನಮ್ಮ ಬಗ್ಗೆ ನಮಗೆ ನಂಬಿಕೆ ಇರಬೇಕು. ನಾವು ಏನೆಂದು ನಮಗೆ ಮಾತ್ರ ಗೊತ್ತಿರುತ್ತದೆ ಎಂದು ಪಾಠ ಮಾಡಿದ್ದಾರೆ ಲಿಲ್ಲಿ.