ಬೆಂಗಳೂರಿನಲ್ಲಿ ಮೈ ಬಳುಕಿಸಿದ ವಿಡಿಯೋ ಹಂಚಿಕೊಂಡ ಕೆನಡಾ ಮೂಲದ ಬಾಲಿವುಡ್ ನಟಿ..!

ಸದ್ಯ ಬಾಲಿವುಡ್​ನಲ್ಲಿ ಮೈಚಳಿ ಬಿಟ್ಟು ಮೈ ಬಳುಕಿಸುತ್ತಿರುವ ನಟಿ ನೋರಾ ಫತೇಹಿಗೆ ಎಲ್ಲಿಲ್ಲದ ಬೇಡಿಕೆ. ನಟಿ ಚಿತ್ರದಲ್ಲಿ ಸೊಂಟ ಬಳುಕಿಸಿದ್ರೆ ಆ ಸಿನಿಮಾ ಸೂಪರ್ ಹಿಟ್ ಆಗುತ್ತೆ ಎಂಬ ಮಾತುಗಳು ಬಿಟೌನ್​ನಲ್ಲಿದೆ. ಹೀಗಾಗಿಯೇ ಇತ್ತೀಚಿನ ಎಲ್ಲಾ ಚಿತ್ರಗಳ ಐಟಂ ಡ್ಯಾನ್ಸ್​ನಲ್ಲಿ ನೋರಾ ಹೆಜ್ಜೆ ಹಾಕುತ್ತಿದ್ದಾರೆ.

ಇದರ ನಡುವೆ ನೋರಾ ದಿನ ಕಳೆದಂತೆ ಅಭಿಮಾನಿ ಬಳಗವನ್ನೂ ಕೂಡ ಹೆಚ್ಚಿಸುತ್ತಾ ಹೋಗುತ್ತಿದ್ದಾರೆ. ಅವರ ಇನ್​ಸ್ಟಾಗ್ರಾಂ​ನಲ್ಲಿ 14 ಮಿಲಿಯನ್ ಫಾಲೋವರ್ಸ್​ ಆಗಿದ್ದಾರೆ. ಈ ಖುಷಿಯನ್ನು ವಿಭಿನ್ನವಾಗಿ ಆಚರಿಸಿದ ನೋರಾ ತಮ್ಮ ಖ್ಯಾತಿಗೆ ಮೈಲೇಜ್ ತಂದುಕೊಟ್ಟ ವಿಡಿಯೋವೊಂದನ್ನು ಶೇರ್ ಮಾಡಿ ಎಲ್ಲರಿಗೂ ಧನ್ಯವಾದ ತಿಳಿಸಿದ್ದಾರೆ.

ಕೆನಡಾ ಮೂಲದ ನೋರಾ ಫತೇಹಿ, 2018ರಲ್ಲಿ ಬೆಂಗಳೂರಿನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಬೆಲ್ಲಿ ನೃತ್ಯ ಪ್ರದರ್ಶಿಸಿದ್ದರು. ಈ ಹಾಡು ವೈರಲ್ ಆಗಿದ್ದಲ್ಲದೇ ಅವಕಾಶಗಳು ಅರಸಿ ಬಂದಿದ್ದವು. ಸಿಕ್ಕ ಅವಕಾಶಗಳನ್ನು ಬಳಸಿಕೊಂಡ ನಟಿ, ಇದೀಗ ಬಾಲಿವುಡ್​ನ ನಂಬರ್ 1 ಐಟಂ ಡ್ಯಾನ್ಸರ್ ಆಗುವತ್ತ ಹೊರಟಿದ್ದಾರೆ.

ನೋರಾ ಸೊಂಟ ಬಳುಕಿಸಿದ ಸತ್ಯಮೇವ ಜಯತೇ ಸಿನಿಮಾದ ದಿಲ್​ಬರ್, ‘ಕಮರಿಯಾ’, ‘ಸಾಕಿ ಸಾಕಿ’, ‘ಏಕ್ ಟು ಕೇಮ್ ಜಿಂದಗಾನಿ’ ಮತ್ತು ‘ಸಮ್ಮರ್ ಸಾಂಗ್’ ಹಾಡುಗಳು ಯೂಟ್ಯೂಬ್​ನಲ್ಲಿ ಧೂಳೆಬ್ಬಿಸಿವೆ. ಒಟ್ಟಾರೆಯಾಗಿ 10ಕ್ಕೂ ಅಧಿಕ ಹಾಡುಗಳಿಗೆ ಹೆಜ್ಜೆ ಹಾಕಿರುವ ನೋರಾ ಸದ್ಯದ ಬಹುಬೇಡಿಕೆಯ ನೃತ್ಯಗಾರ್ತಿಯಾಗಿ ಗುರುತಿಸಿಕೊಂಡಿದ್ದಾರೆ.