ಬಾಲಿವುಡ್‌ ಕಲಾವಿದರಾದ ರಿಷಿ ಕಪೂರ್‌ ಮತ್ತು ರಣಧೀರ್‌ ಕಪೂರ್‌ ಅವರ ಕಿರಿಯ ಸಹೋದರ ರಾಜೀವ್‌ ಕಪೂರ್‌ ಮಂಗಳವಾರ (ಫೆ.9) ನಿಧನರಾದರು.
58ರ ಪ್ರಾಯದ ಅವರಿಗೆ ಹೃದಯಘಾತ ಸಂಭವಿಸಿತು. ಕೂಡಲೇ ಅವರನ್ನು ಮುಂಬೈನ ಖಾಸಗಿ ಆಸ್ಪತ್ರೆಗೆ ಕರೆದುಕೊಂಡು ಬರಲಾಯಿತಾದರೂ ಅವರು ಕೊನೆಯುಸಿರೆಳೆದಿದ್ದಾರೆ ಎಂಬುದನ್ನು ವೈದ್ಯರು ಖಚಿತಪಡಿಸಿದ್ದಾರೆ.
ಕಪೂರ್‌ ಕುಟುಂಬದಲ್ಲಿ ಪದೇಪದೇ ಸಾವು ಸಂಭವಿಸುತ್ತಿದೆ. ಕಳೆದ ವರ್ಷ ರಣಬೀರ್‌ ಕಪೂರ್‌ ತಂದೆ ನಟ ರಿಷಿ ಕಪೂರ್‌ ನಿಧನರಾಗಿದ್ದರು. ಈಗ ರಾಜೀವ್‌ ನಿಧನದಿಂದ ಅವರ ಕುಟುಂಬದಲ್ಲಿ ಮತ್ತೆ ಶೋಕದ ವಾತಾವರಣ ನಿರ್ಮಾಣ ಆಗಿದೆ. ರಾಜೀವ್‌ ಅಗಲಿಕೆಗೆ ಬಾಲಿವುಡ್‌ನ ಅನೇಕರು ಸಂತಾಪ ಸೂಚಿಸುತ್ತಿದ್ದಾರೆ. ಖ್ಯಾತ ಗಾಯಕಿ ಲತಾ ಮಂಗೇಶ್ಕರ್‌ ಅವರು ಟ್ವೀಟ್‌ ಮಾಡುವ ಮೂಲಕ ರಾಜೀವ್‌ಗೆ ಶ್ರದ್ಧಾಂಜಲಿ ಅರ್ಪಿಸಿದ್ದಾರೆ. ‘ರಾಜ್‌ ಕಪೂರ್‌ ಅವರ ಕಿರಿಯ ಪುತ್ರ ರಾಜೀವ್‌ ಕಪೂರ್‌ ನಿಧನರಾದರು ಎಂಬ ಸುದ್ದಿ ನನಗೆ ಈಗ ತಿಳಿಯಿತು. ಇದರಿಂದ ನನಗೆ ತೀವ್ರ ದುಃಖವಾಗಿದೆ. ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ದೇವರಲ್ಲಿ ಪ್ರಾರ್ಥಿಸುತ್ತೇನೆ’ ಎಂದು ಲತಾ ಟ್ವೀಟ್‌ ಮಾಡಿದ್ದಾರೆ.
ಹಿಂದಿ ಚಿತ್ರರಂಗದ ಲೆಜೆಂಡರಿ ನಟ ರಾಜ್‌ ಕಪೂರ್‌ ಹಾಗೂ ಕೃಷ್ಣಾ ಕಪೂರ್‌ ದಂಪತಿಯ ಪುತ್ರನಾದ ರಾಜೀವ್‌ 1962ರ ಆಗಸ್ಟ್‌ 2ರಂದು ಜನಿಸಿದರು. 1983ರಲ್ಲಿ ‘ಏಕ್‌ ಜಾನ್‌ ಹೈ ಹಮ್‌’ ಸಿನಿಮಾ ಮೂಲಕ ಅವರು ಬಾಲಿವುಡ್‌ಗೆ ಕಾಲಿಟ್ಟರು. ತಂದೆ ರಾಜ್‌ ಕಪೂರ್‌ ನಿರ್ದೇಶನ ಮಾಡಿದ್ದ ‘ರಾಮ್‌ ತೇರಿ ಗಂಗಾ ಮೈಲಿ’ ಚಿತ್ರದಲ್ಲಿ ನಟಿಸುವ ಮೂಲಕ ರಾಜೀವ್‌ ಹೆಚ್ಚು ಜನಪ್ರಿಯತೆ ಪಡೆದುಕೊಂಡರು. ಆಸಮಾನ್‌, ಲವರ್‌ ಬಾಯ್‌, ಜಬರ್ದಸ್ತ್‌, ಹಮ್‌ ತೋ ಚಲೇ ಪರ್ದೇಸ್‌ ಮುಂತಾದವರು ರಾಜೀವ್‌ ನಟನೆಯ ಪ್ರಮುಖ ಸಿನಿಮಾಗಳು.
ಕುಟುಂಬದವರು ರಾಜೀವ್‌ ಅವರನ್ನು ಪ್ರೀತಿಯಿಂದ ಚಿಂಪು ಎಂದು ಕರೆಯುತ್ತಿದ್ದರು. ಆರಂಭದಲ್ಲಿ ನಟನಾಗಿ ಮಿಂಚಿದರೂ ಕೂಡ ಬಳಿಕ ಅವರು ನಿರ್ದೇಶನದಲ್ಲಿ ಆಸಕ್ತಿ ಬೆಳೆಸಿಕೊಂಡರು. 1996ರಲ್ಲಿ ಸಹೋದರ ರಿಷಿ ಕಪೂರ್‌ ನಟಿಸಿದ್ದ ‘ಪ್ರೇಮ್‌ ಗ್ರಂಥ್‌’ ಚಿತ್ರಕ್ಕೆ ರಾಜೀವ್‌ ನಿರ್ದೇಶನ ಮಾಡಿದ್ದರು. ನಂತರ ನಿರ್ಮಾಪಕನಾಗಿಯೂ ಸಕ್ರಿಯರಾಗಿದ್ದರು. ಇತ್ತೀಚಿನ ವರ್ಷಗಳಲ್ಲಿ ಬಾಲಿವುಡ್‌ನಿಂದ ಬ್ರೇಕ್‌ ತೆಗೆದುಕೊಂಡಿದ್ದರು.
Comments are closed.