ಐಸಿಸಿ ವಿಶ್ವಕಪ್​​: ಪಾಕ್​​​ ನಾಯಕ ಸರ್ಫರಾಜ್​​​​​ ರಾಜೀನಾಮೆ?

ಲಂಡನ್​: 12ನೇ ಆವೃತ್ತಿಯ ಐಸಿಸಿ ವಿಶ್ವಕಪ್​​ನಲ್ಲಿ ಭಾರತ ತಂಡದ ಎದುರು ಕಳಪೆ ಪ್ರದರ್ಶನ ತೋರುವ ಮೂಲಕ ಸೋತು ಅಭಿಮಾನಿಗಳ ಕೆಂಗಣ್ಣಿಗೆ ಗುರಿಯಾಗಿರುವ ನಾಯಕ ಸರ್ಫರಾಜ್​​ ಅಹ್ಮದ್​​ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುವ ಸಾಧ್ಯತೆಯಿದೆ ಎಂದು ಮೂಲಗಳಿಂದ ತಿಳಿದು ಬಂದಿದೆ.

ಜೂನ್​​ 16 ರಂದು ನಡೆದ ಪಂದ್ಯದಲ್ಲಿ ಭಾರತ ಎದುರು 89 ರನ್​ಗಳಿಂದ ಪಾಕಿಸ್ತಾನ ಸೋತಿತ್ತು. ಪಂದ್ಯದ ವೇಳೆ ಕೀಪಿಂಗ್​​ ಮಾಡುತ್ತಿದ್ದ ಸರ್ಫರಾಜ್​​​​​​ ಅಹ್ಮದ್​​​ ಆಕಳಿಕೆ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಟ್ರೋಲ್​​​​ ಆಗಿತ್ತು. ಸರ್ಫರಾಜ್​​ ಅವರು ಪಂದ್ಯದ ಗೆಲುವಿನ ಬಗ್ಗೆ ನಿರಾಸಕ್ತಿ ವಹಿಸಿದ್ದಾರೆ ಎಂದು ಪಾಕ್​​ ಅಭಿಮಾನಿಗಳ ಸಿಟ್ಟಿಗೆ ಗುರಿಯಾಗಿದ್ದರು.

ನಮ್ಮ ತಂಡ ಟಾಸ್​​ ಗೆದ್ದರೆ ಬ್ಯಾಟಿಂಗ್​ ಆಯ್ಕೆ ಮಾಡಿಕೊಳ್ಳಬೇಕು ಎಂದು ಸರ್ಫರಾಜ್​​ಗೆ ಪಾಕ್​​ ಪ್ರಧಾನಿ ಇಮ್ರಾನ್​​ ಖಾನ್​​​​​​​​​ ಹೇಳಿದ್ದರು. ಆದರೆ, ಅವರ ಮಾತನ್ನು ತಿರಸ್ಕರಿಸಿ ಬೌಲಿಂಗ್​​ ಆಯ್ಕೆ ಮಾಡಿಕೊಂಡಿದ್ದು, ಸೋಲಿಗೆ ಕಾರಣ ಎಂದು ಪಾಕ್​​ ಅಭಿಮಾನಿಗಳು ನಾಯಕನ ವಿರುದ್ಧ ಕಿಡಿಕಾರಿದ್ದರು. ಈ ಹಿನ್ನೆಲೆಯಲ್ಲಿ ಸರ್ಫರಾಜ್​​​ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುವ ಸಾಧ್ಯತೆಗಳಿವೆ ಎಂದು ತಿಳಿದು ಬಂದಿದೆ.