ಕೋಟ ಡಬ್ಬಲ್ ಮರ್ಡರ್ ಕೇಸ್; ಮೂವರ ಜಾಮೀನು ಅರ್ಜಿ ಆದೇಶ ಜೂ.24 ಕ್ಕೆ

ಕುಂದಾಪುರ: ಕೋಟದಲ್ಲಿ ಜ.26ರಂದು ನಡೆದ ಭರತ್ ಹಾಗೂ ಯತೀಶ್ ಎನ್ನುವರ ಅವಳಿ ಕೊಲೆ ಪ್ರಕರಣದಲ್ಲಿ ಭಾಗಿಯಾದ ಆರೋಪ ಎದುರಿಸುತ್ತಿರುವ ಮೂವರು ಆರೋಪಿಗಳು ಜಾಮೀನು ಪಡೆಯಲು ಸಲ್ಲಿಸಿದ ಅರ್ಜಿಯ ವಾದ- ಪ್ರತಿವಾದ ಸೋಮವಾರ ಮತ್ತೆ ಮುಂದುವರಿದಿದ್ದು, ಈ ಕುರಿತಂತೆ ಆದೇಶವನ್ನು ಜೂ.24 ಕ್ಕೆ ಪ್ರಕಟಿಸುವುದಾಗಿ ಕುಂದಾಪುರದ ಜೆ‌ಎಂಎಫ್‌ಸಿ ನ್ಯಾಯಾಲಾಯದ ಪ್ರಥಮ ನ್ಯಾಯಿಕ ದಂಡಾಧಿಕಾರಿ ನ್ಯಾ| ನಾಗಲಕ್ಷ್ಮಮ್ಮ ಘೋಷಿಸಿದ್ದಾರೆ.

ಕೋಟ ಸಮೀಪದ ಮಣೂರಿನಲ್ಲಿ ಈ ಜೋಡಿ ಕೊಲೆ ಪ್ರಕರಣ ನಡೆದಿತ್ತು. ಪ್ರಕರಣದಲ್ಲಿ ಭಾಗಿಯಾಗಿದ್ದರೆನ್ನಲಾದ ಆರೋಪದಲ್ಲಿ ಈವರೆಗೆ 18 ಆರೋಪಿಗಳನ್ನು ಬಂಧಿಸಲಾಗಿತ್ತು. ಈ ಪೈಕಿ ಪೊಲೀಸ್ ಸಿಬಂದಿ ಪವನ್ ಅಮೀನ್, ಸಂತೋಷ್ ಕುಂದರ್ ಹಾಗೂ ತೌಸಿಫ್ ಜಾಮೀನು ಕೋರಿ ನ್ಯಾಯಾಲಯಕ್ಕೆ ಅರ್ಜಿ ಸಲ್ಲಿಸಿದ್ದರು. ಈ ಕುರಿತಂತೆ ವಿಚಾರಣೆ ಜೂ. 15 ರಂದು ಆರಂಭಗೊಂಡಿದ್ದು, ಸೋಮವಾರವೂ ನಡೆಯಿತು.

ಪ್ರಾಸಿಕ್ಯೂಶನ್ ಪರ ಸರಕಾರಿ ಸಹಾಯಕ ಅಭಿಯೋಜಕಿ ಸುಮಂಗಲಾ ನಾಯಕ್ ಪ್ರತಿವಾದಿಸಿದರೆ, ಜಾಮೀನು ಕೋರಿ ಅರ್ಜಿ ಸಲ್ಲಿಸಿದ ಆರೋಪಿಗಳ ಪರ ಕುಂದಾಪುರದ ನ್ಯಾಯವಾದಿ ರವಿಕಿರಣ್ ಮುರ್ಡೇಶ್ವರ ವಾದ ಮಂಡಿಸಿದ್ದರು.