ಮಂಗಳೂರು, ನ.26: ವಾಣಿಜ್ಯೀಕರಣ ಪ್ರಭಾವದಿಂದ ನಾವು ಇಂದು ಇಂಗ್ಲೀಷ್ ಭಾಷೆಗೆ ಹೆಚ್ಚು ಒತ್ತು ನೀಡುತ್ತಿದ್ದರೂ, ನಮ್ಮ ಮಾತೃಭಾಷೆ, ಸಂಸ್ಕೃತಿಯನ್ನು ಮರೆಯಬಾರದು ಎಂದು ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ರಾಯ್ ಕ್ಯಾಸ್ಟಲಿನೋ ಕರೆ ನೀಡಿದರು.ನಗರದ ಲೇಡಿಹಿಲ್ ಇಂಗ್ಲೀಷ್ ಹಿರಿಯ ಪ್ರಾಥಮಿಕ ಶಾಲೆಯ ಸುವರ್ಣ ಮಹೋತ್ಸವ ಕಾರ್ಯಕ್ರಮಕ್ಕೆ ಮಂಗಳವಾರ ಚಾಲನೆ ನೀಡಿ ಮಾತನಾಡಿದರು.ಕರಾವಳಿ ಭಾಗ ಹಲವು ಭಾಷೆಗಳನ್ನು, ಹಲವು ಸಂಸ್ಕೃತಿಗಳನ್ನು ಬೆಸೆದಿರುವ ಪ್ರದೇಶ. ಇಡೀ ದೇಶದಲ್ಲಿ ಇದು ಅತ್ಯಂತ ವಿಶಿಷ್ಟತೆ ಹೊಂದಿರುವ ಭಾಗ. ಹಾಗಾಗಿ ಇಲ್ಲಿನ ಜನರು ಎಲ್ಲ ಕ್ಷೇತ್ರದಲ್ಲೂ ಮುಂಚೂಣಿಯಲ್ಲಿರಲು ಸಾಧ್ಯವಾಗಿದೆ. ತಮ್ಮ ಉದ್ಯಮ, ಉದ್ಯೋಗಗಳಿಗೆ ಇಂಗ್ಲೀಷ್ ಭಾಷೆ ಅಗತ್ಯವೆನಿಸಿದರೂ, ಮಾತೃ ಭಾಷೆಯಾಗಿರುವ ಕೊಂಕಣಿ, ತುಳು, ಕನ್ನಡ ಮರೆಯಬಾರದು. ಈ ನೆಲದ ಸಂಸ್ಕೃತಿಯನ್ನು ಬಿಡಬಾರದು ಎಂದು ಅವರು ಮಕ್ಕಳಿಗೆ ಹಿತವಚನ ಹೇಳಿದರು.
ಭಾರತದ ಪ್ರಧಾನಿ ನರೇಂದ್ರ ಮೋದಿ ಇತ್ತೀಚೆಗೆ ಅಮೆರಿಕಾ ಪ್ರವಾಸ ವೇಳೆ ಹೇಳಿದಂತೆ, ವಿಶ್ವದ ಎಲ್ಲ ದೇಶದ ಜನರು ಅಮೆರಿಕದಲ್ಲಿದ್ದಾರೆ. ಆದರೆ ಭಾರತದ ಜನರು ಮಾತ್ರ ವಿಶ್ವದ ಎಲ್ಲ ಮೂಲೆ ಮೂಲೆಗಳಲ್ಲಿ ಇದ್ದಾರೆ. ಅದೇ ರೀತಿಯಲ್ಲಿ ದಕ್ಷಿಣ ಕನ್ನಡ ಹಾಗೂ ಉಡುಪಿ ಭಾಗದ ಜನರು ವಿಶ್ವದ ಎಲ್ಲ ಕಡೆಗಳಲ್ಲಿ ಕಾಣ ಸಿಗುತ್ತಾರೆ. ಇದಕ್ಕೆ ಮುಖ್ಯ ಕಾರಣ ಇಲ್ಲಿನ ಶಿಕ್ಷಣ ವ್ಯವಸ್ಧೆ. ಕರಾವಳಿ ಭಾಗ ಶಿಕ್ಷಣದಲ್ಲಿ ಕ್ರಾಂತಿಯನ್ನೇ ಸಾಧಿಸಿದೆ. ಹಾಗಾಗಿ ನಮ್ಮ ಇಂಜಿನಿಯರ್‌ಗಳು , ವೈದ್ಯರನ್ನು ನಾವು ವಿಶ್ವದ ವಿವಿಧೆಡೆಗಳಲ್ಲಿ ಕಾಣಬಹುದಾಗಿದೆ ಎಂದು ರಾಯ್ ಹೇಳಿದರು.
ಭಾರತ 202೦ ಇಸವಿಯಲ್ಲಿ ವಿಶ್ವದ ಸೂಪರ್ ಪವರ್ ಎನಿಸಲಿದೆ. ಇದಕ್ಕೆ ಈಗ ಲಭ್ಯ ಇರುವ ಅಂಕಿ- ಅಂಶಗಳೇ ಸಾಕ್ಷಿ. ಮುಂದಿನ ವರ್ಷಗಳಲ್ಲಿ ಭಾರತದಲ್ಲಿ ಯುವಕರ ಪ್ರಮಾಣ ಶೇ.65ರಷ್ಟಾಗಲಿದೆ. ವಿಶ್ವದ ಇತರ ದೇಶಗಳಲ್ಲಿ ವಯೋವೃದ್ಧರ ಪ್ರಮಾಣ ಅಧಿಕವಾಗಲಿದೆ. ಹಾಗಾಗಿ ಇತರ ದೇಶಗಳ ಅಭಿವೃದ್ಧಿ ವೇಗ ಕುಂಠಿತಗೊಳ್ಳಲಿದ್ದು, ಭಾರತ ಎಲ್ಲ ರಂಗಗಳಲ್ಲೂ ಮುಂಚೂಣಿಯಲ್ಲಿ ಬರಲಿದೆ ಎಂದು ಅವರು ವಿವರಿಸಿದರು.ಸುವರ್ಣ ಮಹೋತ್ಸವ ಲಾಂಛನ ಹಾಗೂ ವಿವರಣಾ ಪತ್ರಿಕೆಗಳನ್ನು ರಾಯ್ ಕ್ಯಾಸ್ಟಲಿನೋ ಬಿಡುಗಡೆಗೊಳಿಸಿದರು.
ಸುವರ್ಣ ಮಹೋತ್ಸವ ಪ್ರಯುಕ್ತ ವರ್ಷವಿಡಿ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ.ಶಾಲಾ ಮುಖ್ಯೋಪಾಧ್ಯಾಯನಿ ಸಿಸ್ಟರ್ ಲಿತೀಶಿಯಾ, ಆಡಳಿತ ಮಂಡಳಿ ಜಂಟಿ ಕಾರ್ಯದರ್ಶಿ ಸಿಸ್ಟರ್ ಸೆಲಿನ್ ವೀರಾ, ಶಿಕ್ಷಕ -ರಕ್ಷಕ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ, ಉಪಾಧ್ಯಕ್ಷೆ ರಾಜೇಶ್ವರಿ, ಶಾಲೆ ವಿದ್ಯಾರ್ಥಿ ನಾಯಕಿ ಸಿಯೋನಾ ಫೆರ್ನಾಂಡೀಸ್ ಮತ್ತಿತರರು ಉಪಸ್ಥಿರಿದ್ದರು. ಶಾಲಾ ವಿದ್ಯಾರ್ಥಿನಿಯರಿಂದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು.
