ವಡೋದರ: ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರ ಕನಸಿನ ಯೋಜನೆಯಾಗಿರುವ, ವಿಶ್ವದ ಅತಿ ಎತ್ತರದ ಎಂಬ ಖ್ಯಾತಿಯ ‘ಏಕತೆಯ ಪ್ರತಿಮೆ’ ಇದೀಗ ಅನಿರೀಕ್ಷಿತ ವಿವಾದದಲ್ಲಿ ಸಿಲುಕಿಕೊಂಡಿದೆ. ಭಾರತದ ಉಕ್ಕಿನ ಮನುಷ್ಯ ಎಂದೇ ಹೆಸರು ಪಡೆದ ಸರ್ದಾರ್ ವಲ್ಲಭಭಾಯಿ ಪಟೇಲರ ತವರೂರಿನಿಂದಲೇ ಇದಕ್ಕೆ ಆಕ್ಷೇಪ ಕೇಳಿಬರುತ್ತಿದೆ.
ಈ ವಿಗ್ರಹವು ‘ಉಕ್ಕಿನ ಮನುಷ್ಯ’ನ ಪ್ರಭಾವವನ್ನು ಸಮರ್ಥವಾಗಿ ಬಿಂಬಿಸುತ್ತಿಲ್ಲ ಎಂಬುದು ಸರ್ದಾರ್ ಪಟೇಲರ ಪೂರ್ವಜರ ಪಟ್ಟಣವಾಗಿದ್ದ, ಆನಂದ್ ಜಿಲ್ಲೆಯ ಕರಮ್‌ಸದ್ ಪಟ್ಟಣದ ಜನರ ಬಲವಾದ ನಂಬಿಕೆ.
ಕಳೆದ ಡಿಸೆಂಬರ್ ತಿಂಗಳಲ್ಲಿ ಪಟೇಲರ 18 ಅಡಿ ಎತ್ತರದ ಏಕತಾ ವಿಗ್ರಹದ ಪ್ರತಿಕೃತಿಯನ್ನು ಕರಮ್‌ಸದ್‌ನಲ್ಲಿ ಪ್ರದರ್ಶನಕ್ಕಿಡಲಾಗಿತ್ತು. ಈ ಹಿನ್ನೆಲೆಯಲ್ಲಿ ಊರಿನ ಜನರು ಪ್ರತಿಮೆಯಲ್ಲಿ ಕೆಲವೊಂದು ಬದಲಾವಣೆಗಳನ್ನು ಮಾಡುವಂತೆ, ಯೋಜನೆಯ ಹೊಣೆ ಹೊತ್ತಿದ್ದ ಸರ್ದಾರ್ ವಲ್ಲಭಭಾಯಿ ಪಟೇಲ್ ರಾಷ್ಟ್ರೀಯ ಏಕತಾ ಟ್ರಸ್ಟ್‌ಗೆ ಮನವಿ ಮಾಡಿಕೊಂಡಿದ್ದರು.
ಆದರೆ, 30 ಅಡಿಯ ಮತ್ತೊಂದು ಪ್ರತಿಕೃತಿಯನ್ನು ರಚಿಸಲಾಗಿದ್ದು, ಅದರಲ್ಲಿ ತಾವು ನೀಡಿದ ಸಲಹೆಗಳನ್ನು ಅನುಷ್ಠಾನಗೊಳಿಸಲಾಗಿಲ್ಲ ಎಂಬುದು ಸರ್ದಾರ್ ಪೂರ್ವಿಕರ ಊರಿನವರ ಅಭಿಪ್ರಾಯ. ಈ ಹೊಸ ಪ್ರತಿಕೃತಿಯನ್ನು ಮುಖ್ಯಮಂತ್ರಿ ಆನಂದಿಬೆನ್ ಪಟೇಲ್ ಅವರು ಕಳೆದ ವಾರ ಅನಾವರಣಗೊಳಿಸಿದ್ದರು.
ಈ ಯೋಜನೆಯ ನಿರ್ಮಾಣದ ಗುತ್ತಿಗೆಯನ್ನು ಲಾರ್ಸನ್ ಆ್ಯಂಡ್ ಟೂಬ್ರೋ (L&T) ಕಂಪನಿ ಪಡೆದುಕೊಂಡಿದ್ದು, ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಶಿಲ್ಪಿ ರಾಮ್ ವಿ ಸೂತರ್ ಅವರಿಗೆ ಪ್ರತಿಮೆಯ ಕೆತ್ತನೆಯ ಹೊಣೆ ವಹಿಸಲಾಗಿತ್ತು.
ಈ ಕುರಿತು ಪಟೇಲರ ಸೋದರ ಸಂಬಂಧಿ ಮನುಭಾಯಿ ಅವರ ಪುತ್ರ ಭೂಪೇಂದ್ರಭಾಯಿ ಪಟೇಲ್ ಅವರು ಟೈಮ್ಸ್ ಆಫ್ ಇಂಡಿಯಾಕ್ಕೆ ಮಾಹಿತಿ ನೀಡಿದ್ದಾರೆ.
ಸರ್ದಾರ್ ಪೂರ್ವಿಕರ ಊರಿನವರು ಮಾಡಿರುವ ಪ್ರಮುಖ ಸಲಹೆಗಳು ಹೀಗಿವೆ: * ಪಟೇಲರ ಮೂಗು ತ್ರಿಕೋನಾಕೃತಿಯಲ್ಲಿತ್ತು. ಆದರೆ ಪ್ರತಿಮೆಯಲ್ಲಿ ಅದು ಸರಿಯಾಗಿ ಬಿಂಬಿತವಾಗಿಲ್ಲ. * ಬೇಸರದಲ್ಲಿರುವ, ಕಳಾಹೀನ ಮುಖಭಾವವು ಪಟೇಲರ ವ್ಯಕ್ತಿತ್ವಕ್ಕೆ ಹೊಂದುವುದಿಲ್ಲ. * ಪಟೇಲರ ಬೆರಳುಗಳ ಅಗಲವು, ವಿಗ್ರಹದಲ್ಲಿ ತೋರಿಸಿರುವುದಕ್ಕಿಂತ ಕಿರಿದಾಗಿತ್ತು. * ಪಟೇಲರ ಎಡ ಮತ್ತು ಬಲ ಕಿವಿಗಳು ಭಿನ್ನ ಭಿನ್ನವಾಗಿದ್ದವು, ಆದರೆ ಪ್ರತಿಮೆಯಲ್ಲಿ ಒಂದೇ ರೀತಿಯಿದೆ ಎಂಬಂತೆ ತೋರಿಸಲಾಗಿದೆ. * ಭುಜ ಮತ್ತು ಕುತ್ತಿಗೆಯು ಪ್ರಮಾಣಬದ್ಧವಾಗಿಲ್ಲ. * ಕೈಗಳು ಇನ್ನಷ್ಟು ಉದ್ದವಿರಬೇಕಿತ್ತು. ಪ್ರತಿಮೆಯಲ್ಲಿ ಅವು ಕಿರಿದಾಗಿವೆ.
ಈ ಯೋಜನೆಯ ಉಸ್ತುವಾರಿಗಾಗಿ ಪ್ರಮುಖ ಕಲಾವಿದರ ಸಮಿತಿಯೊಂದನ್ನು ರಚಿಸಬೇಕು ಎಂಬುದು ಕರಮ್‌ಸದ್ ತಂಡದ ಸಲಹೆಯಾಗಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಟ್ರಸ್ಟ್‌ನ ಅಧಿಕಾರಿಯೊಬ್ಬರು, “ಬದಲಾವಣೆಗಳಿಗೆ ಅವಕಾಶವಿದೆ. ಬರ್ದೋಡಿಯಲ್ಲಿ ಕೂಡ ಪ್ರಮುಖ ಚರಿತ್ರಕಾರರು ಮತ್ತು ಸ್ಥಳೀಯರೊಂದಿಗೆ ಮಾತುಕತೆ ನಡೆಸಿ ಅವರ ಸಲಹೆ ಕೇಳಿದ್ದೇವೆ” ಎಂದಿದ್ದಾರೆ.
