ಕಾನ್ಪುರ: ಮನುಷ್ಯ ಅಪರಾಧವೆಸಗಿದರೆ ಕ್ರಮ ಕೈಗೊಳ್ಳಲು ಸೂಕ್ತ ಕಾನೂನು ಕಟ್ಟಳೆಗಳಿವೆ. ಆದರೆ, ಪ್ರಾಣಿ, ಪಕ್ಷಿಗಳಿಗೇನು ಮಾಡುವುದು? ಮಹಿಳೆಯೊಬ್ಬರು ಮಂಗವೊಂದು ಸರಗಳ್ಳತನ ಮಾಡಿದೆ ಎಂದು ದೂರು ನೀಡಿದ ನಂತರ, ಎಫ್ಐಆರ್ ದಾಖಲಿಸುವುದು ಹೇಗೆ ಎಂದು ಪೊಲೀಸರು ಗೊಂದಲಕ್ಕೆ ಒಳಗಾಗಿದ್ದಾರೆ.
‘ವ್ಯಕ್ತಿಯೊಬ್ಬ ಸರಗಳ್ಳತನ ಮಾಡಿದರೆ ಎಫ್ಐಆರ್ ದಾಖಲಿಸಬಹುದು. ಆದರೆ, ಯಾವ ಕೋತಿ ವಿರುದ್ಧ, ಯಾವ ಕಾನೂನಿನಡಿಯಲ್ಲಿ ಪ್ರಕರಣ ದಾಖಲಿಸಬೇಕೆಂದು ತಿಳಿಯುತ್ತಿಲ್ಲ,’ ಎಂದು ನಜೀರಾಬಾದ್ ಠಾಣಾ ಉಸ್ತುವಾರಿ ಅಖಿಲೇಶ್ ಗೌರ್ ತಮ್ಮ ಸಂಕಟ ಹಂಚಿಕೊಂಡಿದ್ದಾರೆ.
ಕೌಸಲ್‌ಪುರಿ ನಿವಾಸಿ ಊರ್ಮಿಳಾ ಸಕ್ಸೇನಾ ಸೋಮವಾರ ದೇವಸ್ಥಾನವೊಂದಕ್ಕೆ ಹೋಗುತ್ತಿದ್ದಾಗ ಮಂಗವೊಂದು ಸರ ಎಳೆದು, ಓಡಿತ್ತು. ‘ಸರಗಳ್ಳತನದ ಬಗ್ಗೆ ಮಾಹಿತಿ ಸಿಕ್ಕಿ ಪೊಲೀಸರು ಸ್ಥಳಕ್ಕೆ ತೆರಳಿದ್ದಾರೆ. ಆದರೆ ಸರಗಳ್ಳತನ ಮಾಡಿರುವುದು ಮಂಗವೆಂದು ತಿಳಿದು, ಯಾವುದೇ ಕ್ರಮ ಕೈಗೊಳ್ಳದೇ ಮರಳಿದ್ದಾರೆ,’ ಎಂದು ಗೌರ್ ತಿಳಿಸಿದ್ದಾರೆ. ‘ಮಂಗಗಳನ್ನು ಹಿಡಿಯುವ ಅಭಿಯಾನ ನಡೆಸಲು ನಗರ ಪಾಲಿಕೆಗೆ ತಿಳಿಸಲಾಗಿದೆ,’ ಎಂದು ಗೌರ್ ಹೇಳಿದ್ದಾರೆ.
