ಕೇಪ್ ಕೆನವೆರಾಲ್: ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಮದ್ಯ ಒಯ್ದು ಪರೀಕ್ಷೆ ನಡೆಸಲು ಜಪಾನ್ ಮುಂದಾಗಿದೆ. ಹಾಗಂತ ಈ ಮದ್ಯವು ನಿಲ್ದಾಣದಲ್ಲಿರುವ ಗಗನಯಾತ್ರಿಗಳು ಕುಡಿಯಲು ಅಲ್ಲ! ಬದಲಾಗಿ, ಭೂಮಿಯಲ್ಲಿದ್ದಾಗ ಮತ್ತು ಅಂತರಿಕ್ಷದಲ್ಲಿರುವಾಗ ಮದ್ಯದ ದ್ರವದಲ್ಲಿ ಆಗುವ ವ್ಯತ್ಯಾಸಗಳನ್ನು ಅರಿಯಲು ಜಪಾನ್‌ನ ಖ್ಯಾತ ಮದ್ಯ ಕಂಪನಿ ಮುಂದಾಗಿದೆ.
ಜಪಾನ್‌ನಿಂದ ಬುಧವಾರ ಉಡಾವಣೆಗೊಂಡು ಬಾಹ್ಯಾಕಾಶ ನಿಲ್ದಾಣದ ಸೇರುವ ವ್ಯೋಮನೌಕೆಯಲ್ಲಿ ಗಗನ ಯಾತ್ರಿಗಳ ಅಗತ್ಯ ವಸ್ತುಗಳು ಸೇರಿ 10 ಸಾವಿರ ಪೌಂಡ್ಸ್ ಸಾಮಾಗ್ರಿಯನ್ನು ಭೂಮಿಯಿಂದ ಅಂತರಿಕ್ಷಕ್ಕೆ ರವಾನಿಸಲಾಗುತ್ತಿದೆ. ಇದರಲ್ಲಿ ಆರು ಮಾದರಿಯ ಮದ್ಯಗಳೂ ಇರಲಿವೆ. ಈ ಪರೀಕ್ಷೆಯ ಉಸ್ತುವಾರಿಯನ್ನು ಜಪಾನ್ ಗಗನಯಾತ್ರಿ ಕಿಮಿಯಾ ಯುಯಿ ವಹಿಸಿದ್ದಾರೆ.
ಸುಮಾರು ಒಂದು ವರ್ಷ ಕಾಲ ಮದ್ಯದ ಮಾದರಿಗಳನ್ನು ಅಂತರಿಕ್ಷದಲ್ಲಿ ಇರಿಸಲಾಗುತ್ತದೆ. ಇದೇ ಅವಧಿಯಲ್ಲಿ ಜಪಾನ್‌ನಲ್ಲೂ ಇದೇ ಆರು ಮದ್ಯದ ಮಾದರಿಗಳನ್ನು ಭೂಮಿಯ ಒಳಗೆ ಹೂತಿಡಲಾಗುತ್ತದೆ. ಒಂದು ವರ್ಷದ ಬಳಿಕ ಅಂತರಿಕ್ಷದಲ್ಲಿದ್ದ ಮದ್ಯವನ್ನು ಭೂಮಿಗೆ ತಂದು, ಅದನ್ನು ಭೂಮಿಯೊಳಗೆ ಊತಿಡಲಾಗಿದ್ದ ಮದ್ಯದ ಜತೆ ಹೋಲಿಸಿ ನೋಡಲಾಗುತ್ತದೆ. ಅಂತರಿಕ್ಷದಲ್ಲಿ ಒಂದು ವರ್ಷ ಕಾಲ ಕಳೆದ ಮದ್ಯದಲ್ಲೇನಾದರೂ ಬದಲಾವಣೆಯಾಗಿದೆಯೇ? ಅದನ್ನು ಕುಡಿದಾಗ ‘ಕಿಕ್’ ಬರುತ್ತದೆಯೇ ಇಲ್ಲವೇ ಎಂಬುದನ್ನು ಅಧ್ಯಯನ ನಡೆಸಲಾಗುತ್ತದೆ.
ನಾಸಾ ಗ್ರೀನ್ ಸಿಗ್ನಲ್
ಜಪಾನ್ ಕಂಪನಿಯ ಈ ‘ಮದ್ಯಪರೀಕ್ಷೆ’ಗೆ ನಾಸಾವೂ ಅನುಮೋದನೆ ನೀಡಿದೆ. ಈ ಹಿಂದೆ ಅಂತರಿಕ್ಷ ನಿಲ್ದಾಣದಲ್ಲಿ ಇಲಿಗಳನ್ನು ಇರಿಸಿ, ಅವನ್ನು ಬಳಿಕ ಭೂಮಿಗೆ ತಂದು ಬದಲಾವಣೆ ಪರೀಕ್ಷಿಸಲಾಗಿತ್ತು. ಅಂತರಿಕ್ಷ ನಿಲ್ದಾಣದೊಳಗೇ ತರಕಾರಿ, ಹಣ್ಣು ಬೆಳೆದುಕೊಳ್ಳುವ ಪರೀಕ್ಷೆಗೂ ಚೀನಾ ಗಗನಯಾತ್ರಿಗಳು ಮುಂದಾಗಿದ್ದನ್ನು ಇಲ್ಲಿ ಸ್ಮರಿಸಬಹುದು.
