ಮಂಗಳೂರು: ಶಾಲೆಗಳಲ್ಲಿ ವಿದ್ಯಾರ್ಥಿಗಳ ಮೇಲೆ ನಡೆಯುತ್ತಿರುವ ಅತ್ಯಾಚಾರ, ಕಿರುಕುಳ ಪ್ರಕರಣಗಳನ್ನು ತಡೆಯಲು ಸರಕಾರ ರಚಿಸುತ್ತಿರುವ ಟಾಸ್ಕ್‌ಫೋರ್ಸ್ ಸೋಮವಾರದಿಂಲೇ ಕಾರ್ಯಾಚರಿಸಲಿದೆ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದರು.
ಪೊಲೀಸ್, ಮಹಿಳಾ ಮತ್ತು ಮಕ್ಕಳ ಇಲಾಖೆ, ವಾರ್ತಾ ಇಲಾಖೆ, ಶಿಕ್ಷಣ ಇಲಾಖೆ ಅಧಿಕಾರಿಗಳುಳ್ಳ ಟಾಸ್ಕ್‌ಫೋರ್ಸ್ ಸಮಿತಿಯು ನಿರಂತರ ಶಾಲೆಗಳಿಗೆ ಭೇಟಿ ನೀಡಿ ಆಡಳಿತ ಮಂಡಳಿ, ಶಿಕ್ಷಕರು, ಪೋಷಕರು, ವಿದ್ಯಾರ್ಥಿಗಳ ಜತೆ ಸಮಾಲೋಚನೆ ನಡೆಸಲಿದ್ದಾರೆ ಎಂದು ಭಾನುವಾರ ನಗರಕ್ಕೆ ಆಗಮಿಸಿದ ಅವರು, ವಿಮಾನ ನಿಲ್ದಾಣದಲ್ಲಿ ಸುದ್ದಿಗಾರರ ಪ್ರಶ್ನೆಗುತ್ತರವಾಗಿ ಮಾತನಾಡಿದರು.
ಶಿಕ್ಷಣ ಸಂಸ್ಥೆಗಳು ಸರಕಾರ ನೀಡಿದ ಮಾರ್ಗಸೂಚಿಗಳನ್ನು ಪಾಲಿಸಬೇಕು. ರಾಜ್ಯದ ಮೂರು ಕಡೆ ಕೂಡಾ ಖಾಸಗಿ ಶಿಕ್ಷಣ ಸಂಸ್ಥೆಗಳಲ್ಲೇ ಅಲ್ಲಿಯ ಸಿಬ್ಬಂದಿಗಳಿಂದಲೇ ವಿದ್ಯಾರ್ಥಿನಿಯರ ಮೇಲೆ ಲೈಂಗಿಕ ಕಿರುಕುಳ ನಡೆದಿದೆ. ಅದನ್ನು ಸರಕಾರ ತಡೆಯುವ ಬದಲು, ಖಾಸಗಿ ಸಂಸ್ಥೆಗಳು ತಮ್ಮ ಉದ್ಯೋಗಿಗಳ ನೇಮಕ ವೇಳೆ ಅವರ ಪೂರ್ವಾಪರ ತಿಳಿದುಕೊಂಡಿರಬೇಕು. ವಿಕೃತ ಮನಸ್ಸಿನವರನ್ನು ಸಂಸ್ಥೆಗೆ ಸೇರಿಸಿಕೊಳ್ಳಬಾರದು ಎಂದು ಅವರು ಹೇಳಿದರು.
ತೀರ್ಥಹಳ್ಳಿಯಲ್ಲಿ ವಿದ್ಯಾರ್ಥಿನಿ ಮೇಲಿನ ಅತ್ಯಾಚಾರ. ಕೊಲೆ ಪ್ರಕರಣದ ನಿಜಾಂಶ ಇನ್ನೂ ತಿಳಿದುಬಂದಿಲ್ಲ. ಇದು ಮೂವರ ಕೃತ್ಯ ಎಂಬ ಪ್ರಾಥಮಿಕ ವರದಿಯಂತೆ ತನಿಖೆ ನಡೆಯುತ್ತಿದೆ. ರಾಜ್ಯದಲ್ಲಿ ಕಾನೂನು ಸುವ್ಯವಸ್ಥೆ ಹದಗೆಟ್ಟಿಲ್ಲ. ಬಿಜೆಪಿ ಕಾಲಕ್ಕಿಂತ ಈಗ ಪರಿಸ್ಥಿತಿ ಚೆನ್ನಾಗಿದೆ. ಎಲ್ಲೇ ಯಾವುದೇ ಘಟನೆ ನಡೆದರೂ ಕಾನೂನು ಕ್ರಮ ಕೈಗೊಳ್ಳಲು ಸರಕಾರ, ಪೊಲೀಸರು ಸಮರ್ಥರಿದ್ದಾರೆ ಎಂದು ಅವರು ಹೇಳಿದರು.
ಮಂಗಳೂರಿನಲ್ಲಿ ನಡೆಯುತ್ತಿರುವ ಸರಣಿ ಹತ್ಯೆ, ಹಲ್ಲೆ, ದರೋಡೆ, ನೈತಿಕ ಪೊಲೀಸ್‌ಗಿರಿ ಕುರಿತ ಪ್ರಶ್ನೆಗೆ ಉತ್ತರಿಸಿದ ಅವರು, ಬಿಜೆಪಿ ಕಾಲದಲ್ಲಿ ಇಂಥದ್ದು ಇರಲಿಲ್ಲವೇ? ಅವರ ಕಾಲಕ್ಕೆ ಹೋಲಿಸಿದರೆ, ನಮ್ಮಲ್ಲಿ ಹೆಚ್ಚು ಘಟನೆಗಳು ನಡೆಯುತ್ತಿಲ್ಲ. ಹಾಗಂತ ನಾನು ಘಟನೆಗಳನ್ನು ಸಮರ್ಥಿಸುತ್ತಿಲ್ಲ ಎಂದು ಸಿಎಂ ಹೇಳಿದರು.
ದುಷ್ಕರ್ಮಿಗಳ ಮೇಳೆ ಗೂಂಡಾ ಕಾಯಿದೆ ಹಾಕುತ್ತಿರುವುದು ಪರಿಣಾಮ ಬೀರುತ್ತಿದೆ. ಕಾಯಿದೆಯ 376ನೇ ವಿಧಿಯಲ್ಲಿ ಎರಡು ತಿದ್ದುಪಡಿ ಮಾಡಲಾಗಿದೆ. ಹಿಂದಿನ ಹಾಗೆ ಎರಡು ಅಪರಾಧ ಮಾಡಬೇಕೆಂದು ಇಲ್ಲ, ಒಂದು ಘಟನೆಯಲ್ಲಿ ಸಿಕ್ಕಿದರೂ ಗೂಂಡಾ ಕಾಯಿದೆ ಹಾಕಬಹುದು. ನಂತರ ಅವರಿಗೆ ಒಂದು ವರ್ಷ ತನಕ ಜಾಮೀನು ಇಲ್ಲ. ಈ ಹಿನ್ನೆಲೆಯಲ್ಲಿ ಎಂ.ಸಿ.ನಾಣಯ್ಯ ನೇತೃತ್ವದ ತಜ್ಞರ ಸಮಿತಿ ವರದಿ ನೀಡಲಿದೆ ಎಂದು ಅವರು ತಿಳಿಸಿದರು.
ಮಂಗಳೂರು ಮಹಾನಗರ ಪಾಲಿಕೆ ಆಯುಕ್ತರ ನೇಮಕ ಆದೇಶ ಹೊರಡಿಸಿದ್ದೂ ನಾನೇ. ಈಗ ವಿಳಂಬ ಮಾಡಿರುವುದೂ ನಾನೇ. ಮುಂದೆ ಕೆಲವು ದಿನಗಳಲ್ಲಿ ನೇಮಕಕ್ಕೆ ಕ್ರಮ ಕೈಗೊಳ್ಳಲಾಗುವುದು ಎಂದು ಪ್ರಶ್ನೆಗೆ ಉತ್ತರವಾಗಿ ಅವರು ಹೇಳಿದರು.
ನೇತ್ರಾವತಿ ನದಿ ತಿರುವು ಯೋಜನೆ ಕುರಿತ ಪ್ರಶ್ನೆಗೆ ಉತ್ತರಿಸಿದ ಅವರು, ಜನರಲ್ಲಿ ಈ ಬಗ್ಗೆ ಗೊಂದಲಗಳಿದ್ದು, ಶೀಘ್ರ ತಜ್ಞರ ಸಭೆ ಮೂಲಕ ಜನರಿಗೆ ಸರಿಯಾದ ತಿಳಿವಳಿಕೆ ನೀಡಲಾಗುವುದು. ಡೀಸೆಲ್ ದರ ಇಳಿಯುವ ಅಂತಾರಾಷ್ಟ್ರೀಯ ಮಾರುಕಟ್ಟೆಯ ಸ್ಥಿತ್ಯಂತರದಿಂದ ಆಗಿದೆ. ಹಾಗಾಗಿ ಈಗಲೇ ಬಸ್ ಪ್ರಯಾಣ ದರ ಕಡಿಮೆ ಮಾಡಿ ಎನ್ನುವುದು ಸರಿಯಲ್ಲ, ಆದರೂ ಪರಿಶೀಲನೆ ನಡೆಸಲಾಗುವುದು ಎಂದು ಹೇಳಿದರು.
