ಬೆಂಗಳೂರು (ಪಿಟಿಐ): ಭಾರತದ ಮಂಗಳ ನೌಕೆ ಕಕ್ಷೆಯನ್ನು ಸಂಧಿಸಲು ಕ್ಷಣಗಣನೆ ಆರಂಭವಾಗಿದೆ. ಅದಕ್ಕೆ ಪೂರ್ವಭಾವಿಯಾಗಿ ಸೋಮವಾರ (ಸೆ.23) ಅತ್ಯಂತ ಮಹತ್ವದ ನೌಕೆಯ ಪಥ ಸರಿಪಡಿಸುವಿಕೆ ಮತ್ತು ಮುಖ್ಯ ದ್ರವ ಎಂಜಿನ್ನಿನ ದಹನಶೀಲತೆಯ ಪರೀಕ್ಷೆ ನಡೆಸಲು ಇಸ್ರೊ ಸಜ್ಜಾಗಿದೆ.
ಮುನ್ನೂರು ದಿನಗಳಿಂದ ನಿದ್ರಾವಸ್ಥೆಯಲ್ಲಿ ಇರಿಸಲಾಗಿರುವ 440 ನ್ಯೂಟನ್‌ ನೂಕುಬಲದ ದ್ರವ ಎಂಜಿನನ್ನು ಸೆ. 23ರಂದು ಸುಮಾರು 4 ಸೆಕೆಂಡುಗಳ ಕಾಲ ಉರಿಸುವ ಯೋಜನೆ ಇದೆ. ಇದು ಯಶಸ್ವಿಯಾದರೆ ಗಗನನೌಕೆಯನ್ನು ಮಂಗಳ ಕಕ್ಷೆಗೆ ಸೇರಿಸುವ ಬಗ್ಗೆ ಇಸ್ರೊದ ವಿಜ್ಞಾನಿಗಳ ವಿಶ್ವಾಸ ಹೆಚ್ಚಾಗಲಿದೆ.
‘ನೌಕೆಯ ಪಥವನ್ನು ನಾಲ್ಕನೇ ಬಾರಿಗೆ ಸರಿಪಡಿಸಲು ಮತ್ತು ಮುಖ್ಯ ದ್ರವ ಎಂಜಿನ್‌ ಉರಿಸುವ ಪರೀಕ್ಷೆಯನ್ನು ನಡೆಸಲು ನಾವೆಲ್ಲರೂ ಸಜ್ಜಾಗಿದ್ದೇವೆ. ಇದಕ್ಕಾಗಿ ಈಗಾಗಲೇ ಸಂಕೇತಾಜ್ಞೆ ಗಳನ್ನು ನೌಕೆಯ ಸಾಧನಕ್ಕೆ ಕಳಿಸಿ ಪರಿಶೀಲನೆ ನಡೆಸಲಾಗಿದೆ’ ಎಂದು ಇಸ್ರೊ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಒಂದೊಮ್ಮೆ ಸೋಮವಾರ ದ್ರವ ಎಂಜಿನ್‌ ಮರುಚಾಲನೆ ವಿಫಲವಾದರೆ ಇಸ್ರೊ ಮುನ್ನೆಚ್ಚರಿಕೆ ಕ್ರಮವಾಗಿ ಮತ್ತೊಂದು ಯೋಜನೆಯನ್ನೂ ನೌಕೆಗೆ ಅಳವಡಿಸಿದೆ. ಆ ಪ್ರಕಾರ, ಸೆ. 24ರಂದು ಎಂಟು ಥ್ರಸ್ಟರ್‌ಗಳನ್ನು ಹೆಚ್ಚಿನ ಅವಧಿಗೆ ಉರಿಸಿ ನೌಕೆಯನ್ನು ಮಂಗಳ ಕಕ್ಷೆಗೆ ಸೇರಿಸಲು ಯತ್ನಿಸಲಾಗುವುದು. ಈ ವಿಧಾನದಲ್ಲಿ ಇಂಧನ ಬಳಕೆ ಸ್ವಲ್ಪ ಹೆಚ್ಚುತ್ತದೆ.
‘ಮುನ್ನೂರು ದಿನಗಳಿಂದ ನಿದ್ರಾವಸ್ಥೆಯಲ್ಲಿ ಇರಿಸಲಾಗಿರುವ ಎಂಜಿನ್‌ ಮತ್ತೆ ಸರಿಯಾಗಿ ಉರಿಯಲಿದೆಯೇ ಎಂಬುದೇ ಕುತೂಹಲದ ವಿಷಯವಾಗಿದೆ. ಇದು ಎಂಜಿನ್‌ ಉರಿಸುವಿಕೆಯ ಪರೀಕ್ಷಾರ್ಥ ಪ್ರಯೋಗ ಇದ್ದಂತೆ. 24ರಂದು ನೌಕೆಯನ್ನು ಮಂಗಳನ ಕಕ್ಷೆಗೆ ಸೇರಿಸುವಾಗ ಈ ಎಂಜಿನ್‌ನ್ನು ಹೆಚ್ಚಿನ ಅವಧಿಗೆ ಉರಿಸಬೇಕಾಗುತ್ತದೆ’ ಎಂದೂ ಅವರು ಹೇಳಿದರು.
