ಹುಬ್ಬಳ್ಳಿ: ನಗರದ ಹೋಟೆಲ್‌ ಕಟ್ಟಡವೊಂದರ ಮೇಲಿನ ಮೊಬೈಲ್ ಟವರ್‌ ಏರಿ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಸಿದ ಮಹಿಳೆಯೊಬ್ಬಳು ಸುಮಾರು ಮೂರು ಗಂಟೆ ಕಾಲ ಪೊಲೀಸರನ್ನು, ಸಾರ್ವಜನಿಕರನ್ನು ತುದಿಗಾಲಲ್ಲಿ ನಿಲ್ಲಿಸಿದ ಘಟನೆ ಭಾನುವಾರ ನಡೆಯಿತು.
ಮಗಳ ಕಣ್ಣಿನ ಶಸ್ತ್ರಚಿಕಿತ್ಸೆಗೆ ದೇಣಿಗೆ ಸಂಗ್ರಹಿಸುತ್ತಿರುವುದಾಗಿ ಹೇಳಿಕೊಂಡಿರುವ ಸಪ್ನಾ ಹಿಲೆರಾ ಪರೇರಾ, ಕಣ್ಣಿಗೆ ಬಟ್ಟೆ ಕಟ್ಟಿಕೊಂಡು ಮುಂಬೈಯಿಂದ ಚೆನ್ನೈಗೆ ಪಾದಯಾತ್ರೆ ಹೊರಟಿದ್ದಾಳೆ. ಭಾನುವಾರ ಮುಂಜಾನೆ 11 ಗಂಟೆಗೆ ಗೋಕುಲ್‌ ರಸ್ತೆಯಲ್ಲಿರುವ ಅಕ್ಷಯ ಹೋಟೆಲ್‌ ಕಟ್ಟಡದ ಮೇಲಿರುವ ಮೊಬೈಲ್ ಟವರ್‌ ಏರಿದ ಸಪ್ನಾಳನ್ನು ಮಧ್ಯಾಹ್ನ 2 ಗಂಟೆ ಸುಮಾರಿಗೆ ಬಲವಂತವಾಗಿ ಕೆಳಗಿಳಿಸುವಲ್ಲಿ ಪೊಲೀಸರು ಯಶಸ್ವಿಯಾದರು.
ಸಪ್ನಾಳ ಗಮನ ಬೇರೆಡೆಗಿರುವುದನ್ನು ಗಮನಿಸಿದ ಗೃಹರಕ್ಷಕ ದಳದ ಸಿಬ್ಬಂದಿಯೊಬ್ಬರು ಸರಸರನೆ ಟವರ್‌ ಏರಿ, ಇತರರ ನೆರವಿನಿಂದ ಆಕೆಯನ್ನು ಹಿಡಿದು ಕೆಳಗಿಳಿಸಿದರು. ಕಟ್ಟಡದ ಮೇಲಿರುವ ಟವರನ್ನು 10 ಅಡಿ ಎತ್ತರದವರೆಗೆ ಏರಿ ನಿಂತ ಸಪ್ನಾ, ಮಗಳ ಚಿಕಿತ್ಸೆಗೆ ಜನರು ದೇಣಿಗೆ ನೀಡುತ್ತಿದ್ದಾರೆ ಎಂದು ಅಲ್ಲಿಂದಲೇ ಸಾವಿರ ರೂಪಾಯಿಯ ನೋಟುಗಳನ್ನು ತೋರಿಸುತ್ತಿದ್ದಳು. ‘ಸರ್ಕಾರ ಸಹಾಯ ನೀಡಬೇಕು. ಬೆಳಗಾವಿಯಲ್ಲಿರುವ ಮುಖ್ಯಮಂತ್ರಿ ಸ್ಥಳಕ್ಕೆ ಬಂದರೆ ಮಾತ್ರ ಕೆಳಗಿಳಿಯುತ್ತೇನೆ. ಇಲ್ಲದಿದ್ದರೆ ಕೆಳಗೆ ಹಾರಿ ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ’ ಎಂದು ಪಟ್ಟು ಹಿಡಿದು ಕಿರುಚುತ್ತಿದ್ದಳು.
ಕೆಲವೊಮ್ಮೆ ಕೈ ಮುಗಿದು ಕಣ್ಣೀರಿಡುತ್ತಿದ್ದಳು. ಮನವೊಲಿಸಿ ಕೆಳಗಿಳಿಸಲು ಟವರ್‌ ಸಮೀಪಕ್ಕೆ ಹೋದ ಪೊಲೀಸರು, ಅಗ್ನಿಶಾಮಕ ಸಿಬ್ಬಂದಿ ಮತ್ತು ಸಾರ್ವಜನಿಕರನ್ನು ಅವಾಚ್ಯವಾಗಿ ನಿಂದಿಸುತ್ತಿದ್ದ ಆಕೆ, ಯಾರಾದರೂ ಟವರ್‌ ಬಳಿ ಸುಳಿದಾಡಿದರೆ ಎರಡೂ ಕೈಗಳನ್ನು ಬಿಟ್ಟು, ಕೆಳಗೆ ಹಾರುವುದಾಗಿ ಬೆದರಿಸುತ್ತಿದ್ದಳು.
ಡಿಸಿಪಿ ಹನುಂತರಾಯ, ಎಸಿಪಿ ಎ.ಆರ್. ಬಡಿಗೇರ, ಗೋಕುಲ ಠಾಣೆ ಇನ್‌ಸ್ಪೆಕ್ಟರ್‌ ಪ್ರಭು ಗೌಡ ಮತ್ತಿತರ ಪೊಲೀಸ್‌ ಅಧಿಕಾರಿಗಳು, ಆಕೆಯ ಮನವೊಲಿಸಲು ಪ್ರಯತ್ನಿಸಿದರೂ ಆಕೆ ಕೆಳಗಿಳಿಯಲು ನಿರಾಕರಿಸಿದಳು. ಕೊನೆಗೆ ಗೃಹ ರಕ್ಷಕ ಆರ್.ಎಚ್‌. ಕಲ್ಯಾಣ್ ಎಂಬುವವರು ಟವರ್‌ ಮೇಲೇರಿ ಆಕೆಯನ್ನು ಹಿಡಿದು ಕೆಳಗಿಳಿಸುವಲ್ಲಿ ಯಶಸ್ವಿಯಾದರು.
ದೇಣಿಗೆ ಸಂಗ್ರಹಿಸಲು ಚೆನ್ನೈವರೆಗೆ ಹೋಗುವುದಾಗಿ ಹೇಳಿಕೊಂಡು ಹೊರಟಿದ್ದ ಸಪ್ನಾ, ಗುರುವಾರ ಸಂಜೆ ಧಾರವಾಡ ತಲುಪಿದ್ದಳು. ‘17 ವರ್ಷದ ನನ್ನ ಮಗಳಿಗೆ ಕಣ್ಣಿನ ಶಸ್ತ್ರಚಿಕಿತ್ಸೆ ಮಾಡಬೇಕಾಗಿದ್ದು, ಮುಂಬೈಯಲ್ಲಿ ಯಾರೂ ನೆರವು ನೀಡುತ್ತ್ತಿಲ್ಲ. ನನ್ನ ಬಳಿ ಅಷ್ಟು ಹಣ ಇಲ್ಲ’ ಎಂದು ಹೇಳುತ್ತಿದ್ದಳು.
