ಕರ್ನಾಟಕದ ಸಿನಿ ಪ್ರೇಮಿಗಳು ಗೂಗಲ್ ಸರ್ಚ್‌ನಲ್ಲಿ ಮುಳುಗಿದ್ದಾಗ ಯಾರ ಬಗ್ಗೆ ತಿಳಿದುಕೊಳ್ಳಲು ಉತ್ಸುಕರಾಗಿರಬಹುದು ಎಂಬ ಕುತೂಹಲ ನಿಮಗೂ ಇರಬಹುದು. ಇತ್ತೀಚೆಗೆ ನಡೆದ ಸಮೀಕ್ಷೆಯೊಂದು ಈ ಕುರಿತು ಅಚ್ಚರಿಯ ಮಾಹಿತಿ ನೀಡಿದೆ. ಅದೇನೆಂದರೆ ಕನ್ನಡಿಗ ಪ್ರೇಕ್ಷಕರು ಸ್ಯಾಂಡಲ್‌ವುಡ್ ನಟ, ನಟಿಯರಿಗಿಂತ ತೆಲುಗು ಹಾಗೂ ತಮಿಳು ಸ್ಟಾರ್‌ಗಳ ಬಗ್ಗೆ ಹೆಚ್ಚು ಆಸಕ್ತಿ ಹೊಂದಿದ್ದಾರೆ. ಹೀಗಾಗಿ ಸಹಜವಾಗಿಯೇ ಸಿನಿ ಪ್ರೇಕ್ಷಕರ ಸರ್ಚ್‌ನಲ್ಲಿ ಟಾಪ್ ಲಿಸ್ಟ್‌ನಲ್ಲಿ ಇರುವವರು ಕಾಲಿವುಡ್ ಹಾಗೂ ಟಾಲಿವುಡ್ ಸ್ಟಾರ್‌ಗಳೇ.
ಈ ಲಿಸ್ಟ್‌ನಲ್ಲಿ ಕನ್ನಡದ ಸುದೀಪ್ ಹಾಗೂ ರಮ್ಯಾ ಇದ್ದರೂ ಅವರು ಟಾಪ್ ಲಿಸ್ಟ್‌ನಲ್ಲಿ ಇಲ್ಲ. ಇದು ಕಳೆದ ಮೂರು ತಿಂಗಳ ಅವಧಿಯಲ್ಲಿ ಕಂಡುಬಂದ ಗೂಗಲ್ ಸಮೀಕ್ಷೆಯ ವರದಿ.
ತಮಿಳಿನ ಅಜಿತ್ ಕುಮಾರ್ ಈ ಲಿಸ್ಟ್‌ನಲ್ಲಿ ಮೊದಲ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಇವರ ಚಿತ್ರಗಳು ಕರ್ನಾಟಕದಲ್ಲಿ ಬಿಡುಗಡೆಯಾದಾಗ ಅಭಿಮಾನಿಗಳು ಹಾಲಿನ ಅಭಿಷೇಕ ಮಾಡುವುದು ಮಾಮೂಲಿ. ಇನ್ನುಳಿದಂತೆ ರಜನೀಕಾಂತ್, ಧನುಷ್ ಮತ್ತು ವಿಕ್ರಮ್ ಈ ಪಟ್ಟಿಯಲ್ಲಿದ್ದಾರೆ. ಇವರನ್ನು ಕನ್ನಡ ಪ್ರೇಕ್ಷಕರು ಆದರ್ಶ ವ್ಯಕ್ತಿಗಳಂತೆ ಕಾಣುವುದೂ ಇದೆ. ಹಾಗಾದರೆ ಕಾಲಿವುಡ್‌ನ ವಿಜಯ್ ಮತ್ತು ಕಮಲ್ ಹಾಸನ್ ಎಲ್ಲಿ ಎಂಬ ಪ್ರಶ್ನೆ ಮೂಡುವುದು ಸಹಜ. ಆದರೆ ಅವರಿಗೆ ಇಲ್ಲಿ ಅಗ್ರಸ್ಥಾನ ಇಲ್ಲ. ವಿಜಯ್ ಅವರ ಪುಲಿ ಚಿತ್ರದ ಟ್ರೇಲರ್ ಈ ತಿಂಗಳಲ್ಲೇ ಬಿಡುಗಡೆ ಆಗಬೇಕಿದೆ. ಕಮಲ್ ಹಾಸನ್ ಅಭಿನಯದ ಪಾಪನಾಶಂ ಇತ್ತೀಚೆಗೆ ಬಿಡುಗಡೆ ಆಗಿದೆ.
ಇನ್ನು ಈ ಲಿಸ್ಟಿನ ಟಾಲಿವುಡ್ ಸ್ಟಾರ್‌ಗಳ ಬಗ್ಗೆ ಹೇಳಬೇಕೆಂದರೆ, ಬಾಹುಬಲಿ ಹೀರೋ ಪ್ರಭಾಸ್, ಯುವ ಜನತೆಯನ್ನು ಆಕರ್ಷಿಸಿದ್ದಾರೆ. ಮಿರ್ಚಿ ಚಿತ್ರದಲ್ಲೂ ಇವರು ಮಿಂಚಿದ್ದರು. ಅಲ್ಲು ಅರ್ಜುನ್ (ಇತ್ತೀಚೆಗೆ ಸನ್ ಆಫ್ ಸತ್ಯಮೂರ್ತಿಯಲ್ಲಿ ನಟಿಸಿದ್ದಾರೆ), ಮಹೇಶ್ ಬಾಬು ( ಇತ್ತೀಚೆಗೆ ಇವರ ಶ್ರೀಮಂತುಡು ಬಿಡುಗಡೆ ಆಗಿದೆ), ಪವನ್ ಕಲ್ಯಾಣ್, ಜೂ. ಎನ್‌ಟಿಆರ್. ಕೂಡ ಈ ಪಟ್ಟಿಯಲ್ಲಿದ್ದಾರೆ.
ಕರ್ನಾಟಕದ ಪ್ರೇಕ್ಷಕರು ಏಕೆ ಟಾಲಿವುಡ್ ಹಾಗೂ ಕಾಲಿವುಡ್ ಸ್ಟಾರ್‌ಗಳತ್ತ ಹೆಚ್ಚು ಆಕರ್ಷಿತರಾಗಿದ್ದಾರೆ ಎಂಬುದಕ್ಕೆ ಗೂಗಲ್ ಯಾವುದೇ ಕಾರಣ ನೀಡಿಲ್ಲ. ಆದರೆ ಬೆಂಗಳೂರು ಸೇರಿದಂತೆ ಗಡಿ ಭಾಗದ ಜನತೆ ಕನ್ನಡೇತರ ಚಿತ್ರಗಳನ್ನು ಹೆಚ್ಚು ನೋಡುತ್ತಾರೆ ಎಂಬುದು ಮಾತ್ರ ಸುಸ್ಪಷ್ಟ. ಈ ಸರ್ಚ್ ಫಲಿತಾಂಶದಲ್ಲಿ ಯಾವುದೇ ಅಚ್ಚರಿಯಿಲ್ಲ ಎನ್ನುತ್ತಾರೆ ಸಿನಿಮಾ ಪಂಡಿತರು. ಕರ್ನಾಟಕದಲ್ಲಿ ಕನ್ನಡ ಮಾತ್ರವಲ್ಲದೇ,ತೆಲುಗು, ತಮಿಳು, ಹಿಂದಿ ಇಂಗ್ಲಿಷ್ ಚಿತ್ರಗಳು ತುಂಬಿದ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುವುದು ಹೊಸದೇನೂ ಅಲ್ಲ.
ಕನ್ನಡದ ಸುದೀಪ್ ನಟರ ಪಟ್ಟಿಯಲ್ಲಿ ಎಂಟನೇ ಸ್ಥಾನ ಪಡೆಯಲು ಅವರು ತೆಲುಗು ಹಾಗೂ ತಮಿಳು ಚಿತ್ರಗಳಲ್ಲಿ ನಟಿಸುತ್ತಿರುವುದೂ ಕಾರಣ ಆಗಿರಬಹುದು. ಅಷ್ಟೇ ಅಲ್ಲ, ಇವರು ಕಿರುತೆರೆಯಲ್ಲೂ ಹಾಗೂ ಜಾಹೀರಾತುಗಳಲ್ಲಿಯೂ ಮಿಂಚುತ್ತಿದ್ದಾರೆ.
ರಮ್ಯಾ ರಾಜಕಾರಣಿಯೂ ಆಗಿರುವುದರಿಂದ ಪ್ರೇಕ್ಷಕರಿಗೆ ಅವರ ಬಗ್ಗೆ ಆಸಕ್ತಿ ಇರುವುದು ಸಹಜ. ಅವರು ನಾಯಕಿಯರಲ್ಲಿ ಏಳನೇ ಸ್ಥಾನ ಪಡೆದುಕೊಂಡಿದ್ದಾರೆ. ಇವರಿಗಿಂತ ಮೊದಲ ಸ್ಥಾನದಲ್ಲಿ ಇರುವವರು ಕಾಜಲ್ ಅಗರ್‌ವಾಲ್, ಅನುಷ್ಕಾ ಶೆಟ್ಟಿ, ತಮನ್ನಾ ಭಾಟಿಯಾ, ಸಮಂತಾ ರುತ್ ಪ್ರಭು, ನಯನತಾರಾ, ತ್ರಿಷಾ, ಪ್ರಿಯಾಮಣಿ, ಸ್ನೇಹಾ ಮತ್ತು ಭಾವನಾ ಮೆನನ್.
