ಪ್ರತಿ ವರ್ಷ ಪ್ರಶಸ್ತಿ ಸುದ್ದಿ ಬಂದಾಗ ಭಾರತದ ಸಿನಿಮಾ ಪಟ್ಟಿಯಲ್ಲಿರುವುದನ್ನು ಹುಡುಕಿ ನೋಡುವ ಸಿನಿಮಾಸಕ್ತರು ಬಹಳಷ್ಟು ಮಂದಿ. ವರ್ಷದ ಬಾಕ್ಸಾಫೀಸ್ ಹಿಟ್‌ಗಳನ್ನು, ಪ್ರಯೋಗಗಳನ್ನು ನೋಡಿ ಮೆಚ್ಚಿಕೊಂಡ ಅನೇಕರಿಗೆ ಇದೊಂದು ಕುತೂಹಲದ ವಿಷಯ.
‘ಲಯರ್ಸ್‌ ಡೈಸ್’ ಈ ಬಾರಿ ಆಸ್ಕರ್‌ಗೆ ಪ್ರವೇಶ ಪಡೆಯುವ ಮೂಲಕ ಸಿನಿಮಾಸಕ್ತರ ಕುತೂಹಲವನ್ನು ಹೆಚ್ಚಿಸಿದೆ. ಶಹೀದ್, ಕ್ವೀನ್, ಮರ್ದಾನಿ, ಯೆಲ್ಲೋ, ಫ್ಯಾಂಡ್ರಿ , ಜತೀಶ್ವರ್ ಸೇರಿದಂತೆ 29 ವಿವಿಧ ಭಾರತೀಯ ಭಾಷೆ ಚಿತ್ರಗಳನ್ನು ಮೀರಿ ಆಯ್ಕೆ ಸಮಿತಿಯ ಪ್ರಶಂಸೆಗೆ ವಿದೇಶಿ ಚಿತ್ರದ ವಿಭಾಗದಲ್ಲಿ ಸ್ಪರ್ಧಿಸುತ್ತಿದೆ.
ಮಲಯಾಳಂ ಚಿತ್ರನಟಿ ಗೀತು ಮೋಹನ್‌ದಾಸ್ ನಿರ್ದೇಶನದ ಮೊದಲ ಚಿತ್ರವಿದು. ಗೀತಾಂಜಲಿ ಥಾಪಾ ಮತ್ತು ನವಾಜುದ್ದೀನ್ ಸಿದ್ದಿಕಿ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಭಾರತ-ಟಿಬೆಟ್ ಗಡಿಯಲ್ಲಿ ವಾಸಿಸುವ ಬುಡಕಟ್ಟು ಮಹಿಳೆಯಾಗಿ ಗೀತಾಂಜಲಿ ಅದ್ಭುತವಾಗಿ ನಟಿಸಿದ್ದಾರೆ. ತನ್ನ ಮೂರು ವರ್ಷದ ಮಗಳೊಂದಿಗೆ ಕಣ್ಮರೆಯಾದ ಪತಿಯ ಹುಡುಕಾಟದಲ್ಲಿ ದೆಹಲಿಗೆ ಪ್ರಯಾಣ ಬೆಳೆಸುತ್ತಾಳೆ. ಈ ಪ್ರಯಾಣದಲ್ಲಿ ಆಕೆಗೆ ಜೊತೆಯಾಗುವಾತ ಒಬ್ಬ ಸೈನಿಕ (ನವಾಜುದ್ದೀನ್).
ಒಂದೆಡೆ ವ್ಯವಸ್ಥೆಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುವ ವ್ಯಕ್ತಿ, ಇನ್ನೊಂದೆಡೆ ಅಭದ್ರತೆ ಆತಂಕದೊಂದಿಗೆ ಹುಡುಕಾಟಕ್ಕೆ ಹೊರಟ ಇನ್ನೊಂದು ಜೀವ.
ಹೆಣ್ಣು ಗಂಡಿನ ಸಂಬಂಧ, ಭಾರತದ ಆರ್ಥಿಕ ಮತ್ತು ಸಾಮಾಜಿಕ ಪರಿಸ್ಥಿತಿ ಚೌಕಟ್ಟಿನಲ್ಲಿ ಕಟ್ಟಿಕೊಡುವ ಪ್ರಯತ್ನವನ್ನು ಗೀತು ಮಾಡಿದ್ದಾರೆ. ಹಾಗಾಗಿ ಆಸ್ಕರ್ ಕದ ತಟ್ಟಿದೆ. 2013ರಲ್ಲೇ ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳಲ್ಲಿ ಪ್ರದರ್ಶನ ಕಂಡು ಮೆಚ್ಚುಗೆ ಪಾತ್ರವಾಗಿರುವ ಈ ಚಿತ್ರ ಭಾರತದಲ್ಲಿನ್ನು ಬಿಡುಗಡೆಯಾಗಿಲ್ಲ. ಮಾರ್ಚ್ ಹೊತ್ತಿಗೆ ತೆರೆ ಕಾಣುವ ನಿರೀಕ್ಷೆ ಇದೆ.
